“ألف رحمة ونور عليه” للشاعر هشام الدشناوي

“ألف رحمة ونور عليه” للشاعر هشام الدشناوي
كتب -

بقلم- هشام الدشناوي:

ألف رحمة ونور عليه
حد فاكر الجنيه

ولا فاكر شكله إيه
كان دهب زمان وقالوا
كان ورق مطبوع عليه
ثم لما شاخ وصدي
بدلوه بعملة فضة
ثم جاتله فجأة خضة
والدولار خزق عينيه
الجنيه أصبح كفيف
تدفعه مصروف لإبنك
تلقي رده ليك سخيف
هو يا والدي النهاردة
الجنيه بيجيب رغيف؟
الغلا أصبح مخيف
الجنيه ما يجيبش بيبسي
ولا مولتو ولا شيبسي
ولا قصقوة ف لبسي
الجنيه كترت مشاكله
ثم راح ونسينا شكله
ألف رحمة ونور عليه
كان مدفي كل جيب
كان لكل الناس حبيب
كنت أعيش اليوم بعشره
عشرة صاغ كانت تجيب
كان رغيف فينو بصاغ
جوز فلافل كان بصاغ
وبتلات تعريفة ترمس
كوز درا جامبو بصاغ
تذكرة ترماي بصاغ
تشتري الجورنال بصاغ
يعني تاكل يعني تشرب
يعني تقرا يعني تركب
ثم تعدل الدماغ
كل دولا بستة صاغ
وأن كسبت ف يوم ريال
تبقي فلة وتبقي عال
يعني بيتك راح يهيص
راح تشبرق ع العيال
والجنيه يقضي معاك
عشرة منه يكفوا شهر
حتى بيكفيك دواك
لأ وتدفع منه مهر
وف حياتك وانت عايش
كنت تتعكز عليه
ألف رحمة ونور عليه

الوسوم